Ամերիաբանկն ու BOGG PLC միջազգային ֆինանսական խումբն ավարտել են բանակցությունները, ըստ որի Ամերիաբանկը կարող է միանալ ԲիօՋիՋի միջազգային խմբին։
Առջևում գործարքի հաստատումների փուլն է, իսկ մինչ այդ ԲիօՋիՋի ֆինանսական խմբի խորհրդի նախագահ Պարոն Մել Քարվլը բանակցությունների բարեհաջող ավարտի առթիվ այց է կատարել Հայաստան։
Այցի շրջանակում պարոն Քարվլը հարցազրույց է տվել, որի ժամանակ առավել մանրամասն ներկայացրել է BOGG ընկերությունը, խոսել հավանական գործարքի մանրամասների ու կարևորության մասին, տվել շարք հարցերի պատասխաններ, օրինակ, ինչո՞ւ Հայաստան և ինչո՞ւ Ամերիաբանկ։ Պարոն Քարվլն անդրադարձել է նաև բանկային խոշոր խմբի անդամ դառնալու պարագայում Ամերիաբանկի և իր հաճախորդների համար բացվող նոր հնարավորություններին։
«BOGG-ն ցուցակված է Լոնդոնի ֆոնդային բորսայի պրեմիում հարթակում: Մենք FTSE 250-ի ցանկում ենք և մեր բաժնետիրական կազմը ներառում է աշխարհի խոշորագույն ֆինանսական խաղացողների՝ JP Morgan, Vanguard, Blackrock, Schroders: Այսպիսով, Ամերիաբանկը մեր միջոցով հասանելիություն կստանա կապիտալի համշխարհային շուկաներին:
Ամերիաբանկն աներևակայելի հաջողված բիզնես է: Ամերիաբանկը շարունակելու է կերտել իր հաջողության պատմությունը՝ մնալով առաջատար հայկական բանկ՝ իր նույն բրենդով: Նույն ղեկավար թիմը կշարունակի առաջնորդել բանկը: Ամենակարևորը՝ բանկի հաճախորդների համար էլ ավելի մեծ ապահովության և կայունության գրավականներ կստեղծվեն, քնաի որ այն ավելի մեծ բանկային խմբի մաս կկազմի, որն ուղիղ հասանելիություն ունի կապիտալի համաշխարհային շուկաներին: Երկու բանկերի ղեկավար թիմերը կկարողանան միասին աշխատելով ավելի լավ պրոդուկտներ և սպասարկում առաջարկել իրենց հաճախորդներին», – նշում է Մել Քարվլը:
