Bybit-ը՝ խոշորագույն կրիպտոարժույթային բորսան, ենթարկվել է հաքերային հարձակման, որի հետևանքով թվային ակտիվներից գողացվել է 1,5 միլիարդ դոլար։ Սա գնահատվում է որպես կրիպտոարդյունաբերության պատմության ամենամեծ գողությունը։
Գողացված միջոցները, որոնք հիմնականում Ethereum էին, արագ փոխանցվել են մի քանի դրամապանակների և լիկվիդացվել տարբեր հարթակներում։
Բլոքչեյն վերլուծությամբ զբաղվող ընկերությունները, այդ թվում՝ Elliptic-ը և Arkham Intelligence-ը, հետևել են գողացված կրիպտոարժույթի տեղաշարժին դեպի տարբեր հաշիվներ և դրա արագ կանխիկացմանը։ Elliptic-ի խոսքով՝ այս հաքերային հարձակումը զգալիորեն գերազանցում է ոլորտի նախկինում գրանցված խոշորագույն գողությունները։
Ավելի ուշ Elliptic-ի վերլուծաբանները հարձակումը կապել են Հյուսիսային Կորեայի Lazarus Group հաքերային խմբավորման հետ, որը ֆինանսավորվում է պետության կողմից և հայտնի է կրիպտոարդյունաբերությունից միլիարդավոր դոլարներ հափշտակելով։
