Float Financial կանադական բիզնես ֆինանսավորման հարթակը ներգրավել է 85 միլիոն կանադական դոլար (60 միլիոն ԱՄՆ դոլար) Series C ֆինանսավորման շրջափուլում։ Շրջափուլը գլխավորել է Inovia Capital-ը՝ Goldman Sachs-ի և գործող ներդրողների մասնակցությամբ։
2021թ.-ին հիմնադրված Float-ը կանադական ընկերություններին առաջարկում է կորպորատիվ քարտեր, ծախսերի կառավարման գործիքներ, հաշիվների վճարման ծառայություններ և բարձր եկամտաբերությամբ հաշիվներ՝ մրցակցելով այնպիսի ամերիկյան ֆինթեք ընկերությունների հետ, ինչպիսիք են Brex-ը և Ramp-ը։
Նոր ֆինանսավորման արդյունքում ընկերության գնահատումը 70%-ով աճել է՝ համեմատած 18 ամիս առաջ Series B ներդրումային շրջափուլում ներգրավված 70 միլիոն կանադական դոլարին։
Այդ շրջափուլից ի վեր Float-ը կրկնապատկել է իր ակտիվ հաճախորդների բազան՝ հասցնելով այն ավելի քան 7,500 կանադական բիզնեսի, իսկ ընկերության եկամուտներն աճել են ավելի քան 120%-ով։
Ներգրավված միջոցները կուղղվեն ֆինանսների ոլորտում ԱԲ ավտոմատացման հնարավորությունների զարգացմանը, Կանադայի տարբեր տարածաշրջաններում ներկայության ընդլայնմանը և պրոդուկտների, հետազոտությունների ու զարգացման, վաճառքի և մարքեթինգի թիմերի ուժեղացմանը։ Ընկերության գլխավոր գործադիր տնօրեն Ռոբ Խազամի խոսքով՝ Float-ը նպատակ ունի ստեղծել ֆինանսական այնպիսի ենթակառուցվածք, որը կաջակցի կանադական բիզնեսների գործունեությանը երկրի ողջ տարածքում։
