Google-ը պաշտոնապես հայտարարել է արհեստական բանականությամբ չաթ-բոտի գործարկման մասին։ Bard նախագիծն աշխատում է Lambda լեզվական մոդելի հիման վրա։
Google-ի պաշտոնական բլոգում հայտնվել է նոր պրոդուկտի մասին հայտարարությունը, որը պետք է պատասխան լինի հանրահայտ ChatGPT չաթ-բոտին։ Ընկերության գործադիր տնօրեն Սունդար Պիչայը Bard-ը նկարագրում է որպես «փորձարարական ինտերֆեյս արհեստական բանականության հետ խոսելու համար»: Չաթ-բոտը կարողանում է պատասխանել օգտատերերի հարցերին և նրանց հետ բովանդակալից զրույց ունենալ:
Ըստ Պիչայի, պատասխաններ ստեղծելիս Bard-ը հիմնվելու է ինտերնետից ստացված տեղեկատվության վրա: Տեսականորեն, դա կարող է լուրջ առավելություն ունենալ ChatGPT-ի նկատմամբ, որը վերապատրաստվել է հնացած տվյալների բազայի վրա և օգտատերերին չի կարող տրամադրել թարմ տեղեկատվություն որոշ հարցերի վերաբերյալ։
Հայտարարության մեջ պրոդուկտը նկարագրվում է որպես ստեղծագործական գործիք: Որպես չաթ-բոտ հավելվածի օրինակ, Bard-ն օգնում է բացատրել Ջեյմս Ուեբ տիեզերական աստղադիտակը 9-ամյա երեխային:
Առաջին փուլում օգտատերերի միայն մի մասը կկարողանա փորձել գործիքը, սակայն առաջիկա շաբաթներին Bard-ը հասանելի կդառնա ավելի շատ մարդկանց։ Դատելով ինտերֆեյսի հասանելի սքրինշոթներից՝ Bard-ը կներդրվի գոյություն ունեցող Google Assistant հավելվածում։
Փետրվարի սկզբին Google-ի մայր ընկերությունը՝ Alphabet-ը հայտնել էր չորրորդ եռամսյակի հիասթափեցնող ֆինանսական արդյունքների մասին: Ըստ զեկույցի՝ Alphabet-ի շահույթը նվազել է ավելի քան մեկ երրորդով։ Bard-ը փորձ է շտկել իրավիճակը՝ մրցելով ChatGPT չաթ-բոտի հետ, որն ընդամենը երկու ամսում դարձել է պատմության մեջ ամենաարագ աճող հավելվածը։
