Նյու Յորքի ֆոնդային բորսայի (NYSE) սեփականատեր Intercontinental Exchange-ը (ICE) համաձայնել է մոտ 5.7 միլիարդ դոլարով ձեռք բերել MarketAxess ֆիքսված եկամտաբերությամբ արժեթղթերի թրեյդինգի էլեկտրոնային հարթակը։
MarketAxess-ը սպասարկում է շուրջ 2,100 ինստիտուցիոնալ ներդրողների և բրոքեր-դիլերների ավելի քան 90 երկրներից՝ ապահովելով կորպորատիվ և համայնքային պարտատոմսերի, ԱՄՆ գանձապետական պարտատոմսերի, եվրոպարտատոմսերի, զարգացող շուկաների պարտքային գործիքների և այլ ֆիքսված եկամտաբերությամբ արժեթղթերի էլեկտրոնային թրեյդինգը։
ICE-ի գնահատմամբ՝ այս ձեռքբերումը կօգնի ընկերությանը ամրապնդել իր դիրքերը պարտատոմսերի շուկայում, որն ունի մոտ 145.1 տրիլիոն դոլարի չմարված պարտք։ Ընկերությունը նշել է, որ MarketAxess-ի ինստիտուցիոնալ հաճախորդների ցանցի համադրումը իր մանրածախ պարտատոմսերի բիզնեսի և տվյալների ենթակառուցվածքի հետ կստեղծի միասնական էկոհամակարգ շուկայի բոլոր մասնակիցների համար։
Սպասվում է, որ միասնական հարթակը կբարելավի իրացվելիությունը, կընդլայնի վերլուծական ու թրեյդինգի գործիքների հասանելիությունը, կբարելավի գնագոյացումը, ինչպես նաև կպարզեցնի թրեյդինգի գործընթացները՝ նպաստելով ավելի որակյալ գործարքների իրականացմանն ո ծախսերի նվազեցմանը։ Միաժամանակ, երկու ընկերությունների գնային տվյալները, ինդեքսները ու վերլուծական հնարավորությունները կձևավորեն ֆիքսված եկամտաբերությամբ գործիքների տվյալների ամենաընդգրկուն հարթակներից մեկը։
Գործարքի ավարտը նախատեսվում է 2027թ.-ի առաջին կեսին՝ բաժնետերերի և կարգավորող մարմինների հաստատումից հետո։ Համաձայն պայմանագրի՝ ICE-ը յուրաքանչյուր բաժնետոմսի համար կվճարի 167 դոլար կանխիկ գումար, ինչը 33%-ով գերազանցում է MarketAxess-ի՝ 2026թ.-ի հուլիսի 29-ի թրեյդինգային օրվա փակման գինը։
