Nvidia-ն համաձայնության է եկել 12.9 միլիարդ դոլարով ձեռք բերել Hugging Face ԱԲ հարթակը. այս մասին հայտնել է The Information-ը։ Սակայն Business Insider-ը նշել է, որ ընկերությունները դեռևս վերջնական համաձայնագիր չեն ստորագրել, և գործարքը կարող է նաև չկայանալ։ Nvidia-ն և Hugging Face-ը առայժմ չեն մեկնաբանել տեղեկությունները։
2016թ.-ին հիմնադրված Hugging Face-ը բաց կոդով ԱԲ մոդելների փոխանակման և հասանելիության տրամադրման առաջատար հարթակներից է։ Ընկերության ձեռքբերումը Nvidia-ին հնարավորություն կտա զգալիորեն ամրապնդել իր դիրքերը բաց կոդով ԱԲ-ի ոլորտում, հատկապես հաշվի առնելով այն, որ ծրագրավորողները սկսել են ավելի հաճախ փնտրել այլընտրանքներ փակ համակարգերին, այդ թվում OpenAI-ի և Anthropic-ի լուծումներին։
Գործարքը կարող է նաև օգնել Nvidia-ին պահպանել իր գերիշխող դիրքը ԱԲ չիպերի շուկայում։ ԱԲ ոլորտի խոշոր ընկերությունները, այդ թվում՝ OpenAI-ը, Google-ը, Amazon-ը և Anthropic-ը արդեն մշակում են իրենց սեփական պրոցեսորները՝ Nvidia-ից կախվածությունը նվազեցնելու համար։ Բաց կոդով ԱԲ-ի ավելի զարգացած էկոհամակարգը կարող է ստիպել ավելի շատ ընկերությունների և ծրագրավորողների շարունակել օգտվել Nvidia-ի սարքավորումներից։ Ընկերությունն արդեն իսկ մեծ ներդրումներ է կատարել բաց կոդով ԱԲ-ի զարգացման մեջ։
Հնարավոր ձեռքբերումը կամրապնդի Nvidia-ի դիրքերը նաև ամպային հաշվարկների ոլորտում։ Hugging Face-ն արդեն օգնում է ծրագրավորողներին ԱԲ մոդելները գործարկել վարձակալվող հաշվարկային ռեսուրսների միջոցով, ինչը Nvidia-ին հնարավորություն կտա ընդլայնել իր ամպային բիզնեսը՝ առանց ամբողջ ենթակառուցվածքը զրոյից կառուցելու անհրաժեշտության։ Գործարքը կարող է նաև օգնել Nvidia-ին օգտագործել ամպային հաշվարկային հզորության այն ծավալը, որի համար հաճախորդները կնքել են օգտագործման պայմանագիր, սակայն չեն օգտագործում կամ դրա կարիքը չունեն։
12.9 միլիարդ դոլար գնահատված գործարքը գրեթե երեք անգամ գերազանցում է Hugging Face-ի 2023թ.-ի ֆինանսավորման շրջափուլում գրանցած 4.5 միլիարդ դոլար գնահատումը։ Ընկերությունը ներկայումս տարեկան շուրջ 150 միլիոն դոլար եկամուտ է ստանում և, ըստ տեղեկությունների, շուտով կհասնի շահութաբերության։ Hugging Face-ը նախկինում մերժել էր Nvidia-ի առաջարկած 500 միլիոն դոլար ներդրումը, որը ընկերությունը կգնահատեր 7 միլիարդ դոլար, սակայն ամբողջական ձեռքբերումը Hugging Face-ին հնարավորություն կտա օգտվել Nvidia-ի զգալիորեն ավելի մեծ ֆինանսական ռեսուրսներից, միաժամանակ խուսափելով մեկ դոմինանտ ներդրող ունենալու հետ կապված սահմանափակումներից։
