OpenAI-ը ձեռք է բերել Glass Imaging սմարթֆոնների տեսախցիկների տեխնոլոգիաներ մշակող ստարտափը ավելի քան 300 միլիոն դոլար արժողությամբ գործարքով. այս մասին հայտնում է The Wall Street Journal-ը։ 2019թ.-ին հիմնադրված և Կալիֆոռնիայի Լոս Ալտոս քաղաքում գործող ընկերությունը մինչ ձեռքբերման գործարքը ներգրավել էր շուրջ 30 միլիոն դոլար տարբեր ներդրողներից։
Glass Imaging-ը հիմնադրել են Apple-ի նախկին ինժեներներ Զիվ Աթարը և Թոմ Բիշոփը, ովքեր աշխատել են Apple-ի Portrait Mode-ի մշակմամբ զբաղվող թիմում։ Apple-ում ձեռք բերած փորձն անմիջականորեն ազդել է Glass Imaging-ի՝ արհեստական բանականության միջոցով սմարթֆոնների լուսանկարների որակը բարելավելու մոտեցման վրա։
Լուսանկարն արվելուց հետո այն պարզապես ԱԲ-ով խմբագրելու փոխարեն՝ Glass Imaging-ն արհեստական բանականությունն ու նեյրոնային ցանցերը ներդնում է հենց տեսախցիկի համակարգում։ Ընկերության տեխնոլոգիան նեյրոնային ցանցերի միջոցով ուսումնասիրում և հասկանում է առանձին սմարթֆոնների տեսախցիկների առանձնահատկությունները՝ հենց նկարահանման պահին ավելի բարձր որակով լուսանկարներ ստանալու համար։
OpenAI-ը դեռևս չի մեկնաբանել գործարքի մասին տեղեկությունները։ Այդ մասին լուրերի ֆոնին շրջանառվում են նաև տեղեկություններ, որ ընկերությունը մշակում է սեփական սարքավորումները, այդ թվում՝ սմարթֆոններ, ականջակալներ և ԱԲ-ով աշխատող այլ սարքեր։
Գործարքը նաև հաջորդում է OpenAI-ի և Apple-ի դիզայնի թիմի նախկին ղեկավար Ջոնի Այվի միջև համագործակցության ընդլայնմանը։ 2025թ.-ին OpenAI-ի գլխավոր գործադիր տնօրեն Սեմ Ալթմանը և Այվը հայտնել էին սարքավորումներ մշակող io ընկերության շուրջ համագործակցության մասին, որն ավելի ուշ OpenAI-ը ձեռք բերեց 6.5 միլիարդ դոլար գնահատված գործարքի շրջանակում։
