OpenAI-ը ներկայացրել է լեզվի մոդելի նոր տարբերակը՝ գեներատիվ արհեստական բանականության GPT-4o-ն, ասվում է ընկերության կայքում:
Անվան մեջ «o»-ն «omni»-ի հապավումն է (այսինքն՝ «բազմակողմանի»): Մոդելի նոր տարբերակն աշխատում է խոսքի, տեքստի և տեսանյութի հետ։ GPT-4o-ն ձայնին արձագանքում է միջինը 320 միլիվայրկյանում, ինչը համեմատելի է զրույցի ժամանակ մարդու արձագանքման ժամանակի հետ, նշել է ընկերությունը։
«GPT-4o-ն կարող է աշխատել ձայնի, տեքստի և տեսողության հետ: Եվ դա չափազանց կարևոր է, քանի որ մենք նայում ենք մեր և մեքենաների միջև փոխգործակցության ապագային», – ասել է OpenAI-ի տնօրեն Միրա Մուրատին՝ մայիսի 13-ին OpenAI-ի Սան Ֆրանցիսկոյի գրասենյակում շնորհանդեսի ժամանակ:
Նոր մոդելը համապատասխանում է GPT-4 Turbo-ի՝ OpenAI-ի նախորդ «ամենաառաջադեմ» մոդելի կատարողականին, սակայն նախկին տարբերակների համեմատ՝ GPT-4o-ն «հատկապես լավ է նկարների և աուդիո ըմբռնման մեջ», – հայտարարում է ընկերությունը:
Ինչպես հայտնում է TechCrunch-ը, GPT-ն վաղուց առաջարկել է ձայնային ռեժիմ, սակայն GPT-4o-ն զգալիորեն բարելավում է այս հատկությունը՝ թույլ տալով օգտատերերին շփվել ChatGPT-ի հետ՝ որպես օգնական:
