OpenAI-ը ներկայացրել է GPT-6 Astra-ով աշխատող Dot-եր նոր անձնական գործակալային օգնականները։ Ընկերությունը Dot-երը նկարագրում է որպես մշտապես ակտիվ գործակալներ, որոնք կարող են ինքնուրույն և օգտատերերի նվազագույն վերահսկողությամբ կատարել տարբեր առաջադրանքներ։
Ի տարբերություն Codex-ի և ChatGPT-ի՝ Dot-երը նախատեսված են կոնկրետ սարքից կամ ինտերֆեյսից անկախ աշխատելու համար։ Օգտատերերը կարող են ստեղծել իրենց հիմնական Dot-ը, անուն տալ դրան և սահմանել նպատակներ։ OpenAI-ը նախատեսում է, որ հետագայում մի քանի Dot-եր կկարողանան համատեղորեն աշխատել օգտատերերի փոխարեն։
Dot-երը կարելի է օգտագործել տարբեր նպատակներով։ Օրինակ՝ ծրագրավորողը կարող է Dot-ին հանձնարարել հետևել հաճախորդների արձագանքներին և անհրաժեշտության դեպքում շտկել սխալները, իսկ գիտնականը կարող է այն օգտագործել վերլուծությունները կրկնելու և նոր տվյալների ի հայտ գալու դեպքում անսպասելի արդյունքներն ուսումնասիրելու համար։
Օգտատերերը կկարողանան Dot-երի հետ շփվել Slack-ի, Teams-ի և աշխատանքային այլ հարթակների միջոցով, իսկ տեքստային հաղորդագրություններով շփվելու հնարավորությունը նախատեսվում է ավելացնել ավելի ուշ։ OpenAI-ը նախատեսում է ստեղծել նաև մասնագիտացված Dot-եր, որոնք կունենան կոնկրետ պարտականություններ կատարելու համար անհրաժեշտ ինքնություններ, թույլտվություններ և գործիքներ։
Dot-երի հիմքում ընկած հնարավորությունների մեծ մասն արդեն հասանելի էր Codex-ի և նմանատիպ գործակալային համակարգերի միջոցով, սակայն Dot-երը դրանք միավորում են՝ շեշտը դնելով ավելի ինքնավար գործունեության վրա։ Միաժամանակ, պրոդուկտը ունի նաև խաղային, մուլտֆիլմային արտաքին՝ փոքրիկ լողացող կետերի տեսքով, որոնք ԱԲ օգնականներին դարձնում են ավելի հասանելի և մարդամոտ։
