Ozon բանկը ստացել է Ռուսաստանի Կենտրոնական բանկի բրոքերային գործունեություն իրականացնելու լիցենզիա։ Որոշման մասին հայտարարվել է ռուսական ԿԲ-ի պաշտոնական կայքում։
Այն համապատասխանում է Ozon-ի՝ ֆինթեք և ներդրումային ծառայություններն ընդլայնելու ռազմավարությանը։
Մարքեթփլեյսը նախատեսում է 2026թ.-ից սկսած զարգացնել ներդրումային բիզնեսը ֆինթեք ստորաբաժանման միջոցով։ Ozon-ը արդեն ստեղծել է Ozon Asset Management ընկերությունը, որը վերջերս ստացել է ներդրումային, փոխադարձ ներդրումային և ոչ պետական կենսաթոշակային ֆոնդերի կառավարման լիցենզիա, ինչպես նաև նախատեսում է ստանալ դեպոզիտար լիցենզիա։
Հաջորդ տարվանից Ozon-ը մտադիր է հաճախորդներին առաջարկել հասանելիություն փոխադարձ ներդրումային ֆոնդերին և թվային ֆինանսական ակտիվներին։ Բրոքերային բիզնեսի զարգացման հետ մեկտեղ ընկերությունը նախատեսում է ավելացնել նաև այլ ներդրումային ծառայություններ, այդ թվում՝ առևտուր ռուսական ընկերությունների բաժնետոմսերով՝ նախ կենտրոնանալով մանրածախ ներդրողների վրա, միաժամանակ դիտարկելով լուծումներ կորպորատիվ հաճախորդների համար։
