Հնդկաստանի ամենահարուստ մարդուն՝ Մուկեշ Ամբանիին պատկանող Reliance Jio-ն իր JioPC ամպային համակարգչային ծառայությունը հասանելի է դարձրել Հնդկաստանի բոլոր ինտերնետ օգտատերերի համար. նախկինում այն բաց էր միայն Jio-ի ինտերնետի բաժանորդների համար։ Ծառայությունը թույլ է տալիս օգտատերերին ամպային համակարգի միջոցով հասանելիություն ստանալ վիրտուալ համակարգչի՝ առանց իրենց համակարգիչը թարմացնելու կամ փոխարինելու անհրաժեշտության։
JioPC-ն առաջարկում է մինչև 8 վիրտուալ պրոցեսորներ, 16 ԳԲ օպերատիվ հիշողություն և 1 ՏԲ պահեստային հիշողություն։ Jio-ն նշել է, որ նույնիսկ մինչև ութ տարվա հնության համակարգիչները կարող են այս ծառայության միջոցով ստանալ ժամանակակից հավելվածների, այդ թվում՝ ԱԲ գործիքների համար անհրաժեշտ հաշվողական հզորությունը։ Փաթեթների արժեքը սկսվում է երկու ամսվա համար 1,000 հնդկական ռուփիից (մոտ 11 դոլար), իսկ տարեկան բաժանորդագրությունը կազմում է 4,000-5,000 հնդկական ռուփի (մոտ 42-53 դոլար)։
Այս քայլը կատարվում է Հնդկաստանում սպառողների ու բիզնեսների կողմից հին համակարգիչները երկարաժամկետ օգտագործելու սովորության ֆոնին։ 2025թ.-ի դրությամբ երկրում օգտագործվում է ավելի քան 65 միլիոն համակարգիչ, իսկ սարքերի փոխարինման պարբերականությունը երկարել է, քանի որ օգտատերերը փորձում են խուսափել սարքավորումների թանկարժեք թարմացումներից։
Jio-ն ակնկալում է, որ ամպային տեխնոլոգիաները կարող են ավելի մատչելի այլընտրանք դառնալ նոր համակարգիչներ գնելու պահանջին։ Սակայն վերլուծաբանների կարծիքով՝ JioPC-ն ամբողջությամբ չի կարողանա փոխարինել ավանդական համակարգիչներին և ավելի հարմար կլինի ուսանողների, ընտանիքների ու փոքր բիզնեսների համար, որոնք չեն կարող իրենց թույլ տալ նոր՝ ԱԲ-ին հարմարեցված համակարգիչներ։
Միևնույն ժամանակ, ծառայությունը բախվում է մի շարք մարտահրավերների, այդ թվում՝ Հնդկաստանում սարքավորումները սեփականության իրավունքով ունենալու նախընտրությանը, համակարգիչների վերանորոգման ընկերությունների կողմից մրցակցությանը և կայուն ինտերնետ կապից կախվածությանը։ Թեև Jio-ն ծառայությունը ներկայացնում է որպես «ԱԲ-ին պատրաստ» լուծում, դեռ պարզ չէ, թե արդյոք սպառողները ամպային հաշվարկային տեխնոլոգիան կընդունեն որպես ամենօրյա կիրառման երկարաժամկետ ծառայություն, թե պարզապես իրենց սարքերը թարմացնելուն այլընտրանք։
