FinTech.am-ը զրուցել է TCF ընկերության համահիմնադիր և տնօրեն Նարեկ Վարդանյանի հետ, ով ներկայացրել է պարտատոմսերի շուկայի կարևորությունը և ներդրումների նոր մշակույթի կիրառումը Հայաստանում:
1. Ինչո՞ւ պիտի մեր հասարակությունը փոխվի դեպի պարտատոմսերի կամ բաժնետոմսերի մշակույթ, ի՞նչ է դա մեզ տալիս:
Կարծում եմ՝ դա մեզ տալիս է ֆինանսական ավելի մեծ գրագիտություն, որովհետև կարողանում ենք ավելի դիվերսիֆիկացնել և ճկուն օգտագործել մեր ֆինանսական միջոցները՝ արդյունքում ստանալով ավելի շատ եկամուտ: Հասանելիությունը մեզ հնարավորություն է տալիս հասկանալու, թե ինչպես կիրառել և օգտագործել մեր ֆինանսական միջոցները ավելի գրագետ ձևով:
Պարտատոմսերը հետաքրքիր գործիքներ են, որոնց միջոցով ոչ միայն հնարավոր է շահավետ ներդրումներ կատարել և ավելի բարձր եկամուտ ստանալ, քան ավանդների կամ այլ գործիքների դեպքում, այլև ունենալ ճկունություն՝ վաճառելով դրանք երկրորդային շուկայում: Ամենակարևոր առավելությունը, թերևս, տեղեկացվածությունն է, որ մարդիկ իմանան՝ ինչ հնարավորություններ ունեն:
Այսօր Հայաստանում կան տարբեր ներդրումային հնարավորություններ, և անկախ ֆինանսական միջոցների չափից, մարդիկ աստիճանաբար պետք է մուտք գործեն այս ոլորտ:
2. Արդյո՞ք պարտատոմսերը կարող են փոխարինել արագ գումար աշխատելու միջոցները, օրինակ՝ կրիպտոարժույթները:
Ներդրումների դեպքում միշտ կա մեդալի հակառակ կողմը: Ամեն ինչ կախված է մարդու ռիսկի հանդուրժողականությունից՝ ինչքան ռիսկայնություն է պատրաստ վերցնել իր վրա: Կարող ես ներդնել կրիպտոարժույթներում, կարող ես պարտատոմսեր գնել: Չի նշանակում, որ պետք է լինել ծայրահեղ որևէ կողմում. գրագետ ներդրողները պորտֆել են ձևավորում, որի մի մասը կարող է ներառել բարձր ռիսկային գործիքներ՝ բիթքոյին, կրիպտո, իսկ մյուս մասը՝ կայուն և կանխատեսելի՝ պետական կամ կորպորատիվ պարտատոմսեր: Այդպես, եթե ռիսկային գործիքները տատանումներ ունենան, կայունները կփոխհատուցեն:
3. Որո՞նք են հիմնական պատճառները, որ հետխորհրդային երկրների քաղաքացիները պետք է ավանդական ավանդները փոխարինեն պարտատոմսերով կամ բաժնետոմսերով:
Առաջին պատճառն այն է, որ պարտատոմսերը սովորաբար տալիս են ավելի բարձր եկամուտ, քան ավանդները: Բացի այդ, հնարավոր է, որ ապագայում եկամտահարկից ազատվեն:
Բացի ֆինանսական եկամտաբերությունից, ներդրողները դառնում են նաև ընկերությունների զարգացման մաս: Այսօր բազմաթիվ քաղաքացիներ ներդրումներ են կատարել TCF-ում և դարձել մեր հաջողության մասնակիցը՝ օգնելով մեզ մտնել նոր շուկաներ, ընդլայնել մասնաճյուղերը, օրինակ՝ Չինաստանում, Ճապոնիայում, Կորեայում:
4. Հայաստանում պարտատոմսերի թողարկման հարցում որևէ սահմանափակում կա՞
Պարտատոմսերը հիմնականում դրամով են, ինչը դրանք հետաքրքիր է դարձնում հենց Հայաստանի քաղաքացիների համար: Ինչ վերաբերում է ներդրողների թվին, ապա մենք արդեն անցել ենք ցուցակման շեմը, և գործընթացը շատ հաջող է ընթանում:
5. Ո՞րն է հիմնական ռիսկը, որը պետք է հաշվի առնել TCF-ի պարտատոմսեր գնելուց առաջ:
Ինչպես ցանկացած ներդրման դեպքում, այստեղ ևս կա որոշակի ռիսկայնություն: Եթե ընկերության գործերը վատթարանան, սնանկանա կամ այլ խնդիրներ առաջանան, ներդրողը կարող է բախվել դժվարություններին: Սակայն պարտատոմսերի թողարկումը խիստ վերահսկվում է թե՛ Կենտրոնական բանկի, թե՛ աուդիտորական ընկերությունների կողմից, ինչ նշանակում է, որ ցանկացած ընկերություն, որը ստանում է պարտատոմս թողարկելու թույլտվություն, անցնում է խիստ ստուգումների և վերահսկման գործընթաց:
6. Ո՞րն է TCF-ի առաքելությունը:
TCF-ի առաքելությունն է ստեղծել միջավայր, որտեղ բոլոր ազդեցիկ նորարարությունները հասնում են հաջողության: Մեր ընկերությունների խմբի միջոցով մենք փորձում ենք աջակցել հայաստանյան և արտասահմանյան գործարարներին, որոնք ունեն հետաքրքիր գաղափարներ, օգնելով նրանց իրականացնել նախագծերն ու հաջողության հասնել միջազգային շուկաներում:
