Visa-ն համաձայնել է Permira-ի կողմից կառավարվող ֆոնդերից 2.4 միլիարդ կանխիկ դոլարով ձեռք բերել BioCatch իսրայելական վարքագծային բիոմետրիկայի ընկերությունը։
BioCatch-ն օգտագործում է արհեստական բանականություն և մեքենայական ուսուցում՝ հազարավոր ազդանշաններ, այդ թվում՝ ստեղնաշարի սեղմումները, սենսորային էկրանի հպումները, սարքերի օգտագործումը և ցանցային ակտիվությունը վերլուծելու, իրական ժամանակում զեղծարարությունները հայտնաբերելու և իրական օգտատերերին հանցագործներից տարբերելու նպատակով։
Ընկերությունն ամբողջ աշխարհում պաշտպանում է 1.8 միլիարդ սարքեր և 760 միլիոն օգտատերերի, ինչպես նաև սպասարկում է 21 երկրում գործող ավելի քան 350 բանկային հաճախորդների, այդ թվում՝ աշխարհի խոշորագույն բանկերից ավելի քան 100-ին։
Visa-ն հայտնել է, որ վերջին հինգ տարիների ընթացքում ավելի քան 13 միլիարդ դոլար է ներդրել տեխնոլոգիաների և ենթակառուցվածքների զարգացման մեջ՝ վճարային զեղծարարությունների դեմ պայքարելու համար։ Ընկերությունն ակնկալում է, որ BioCatch-ը կօգնի բանկերին հայտնաբերել սպառնալիքները նախքան դրանք կհանգեցնեն զեղծարարական գործարքների իրականացմանը։
Visa-ի ղեկավարներից Էնդրյու Թորեն նշել է, որ հաշիվների անօրինական կերպով սեփականացումը և այլ խարդախությունները համաշխարհային տնտեսությանը տարեկան ավելի քան 1 տրիլիոն դոլարի վնաս են հասցնում, իսկ ԱԲ-ն նման հարձակումները դարձնում է ավելի բարդ և մասշտաբային։ Ակնկալվում է, որ գործարքը կամրապնդի Visa-ի՝ զեղծարարությունների կանխարգելման կարողությունները և կնպաստի թվային վճարումների նկատմամբ վստահության բարձրացմանը։
