Սեմ Ալթմանի աջակցությամբ գործող World կրիպտոնախագիծը, որը նախկինում հայտնի էր Worldcoin անվամբ, գործարկում է World Money ֆինանսական հավելվածը, որը հասանելի կլինի ավելի քան 150 երկրներում։
Հավելվածը մեկ հարթակում համատեղում է սթեյբլքոիններով վճարումները, կրիպտոակտիվների թրեյդինգը, եկամուտ ստանալու հնարավորություններն ու վիրտուալ հաշիվները։
World Money-ն հասանելի է ութ արժույթներով և հնարավորություն է տալիս օգտատերերին միջազգային փոխանցումներ կատարել թվային ակտիվներով։ Այն նաև ինտեգրված է Stripe-ի, Kalshi-ի և Morpho-ի ծառայություններին, իսկ World ID-ով նույնականացումը կարող է լրացուցիչ պարգևատրումներ ապահովել համապատասխան եկամտային ծրագրերում։
Stripe-ի ինտեգրման միջոցով ԱՄՆ-ի օգտատերերը կարող են իրենց հաշիվները համալրել Apple Pay-ի միջոցով գումարը սթեյբլքոինների փոխարկելով։ Գործարքները սովորաբար իրականացվում են մի քանի րոպեում։ Հասանելի ակտիվներն ու հնարավորությունները կարող են տարբերվել՝ կախված իրավազորությունից։
World-ը նշել է, որ իր ինքնության համակարգը հավելվածի առանցքային բաղադրիչներից է, քանի որ ստուգված իրական օգտատերերի առկայությունը կարող է բարձրացնել ֆինանսական գործարքների նկատմամբ վստահությունը, մասնավորապես հաշվի առնելով այն, որ արհեստական բանականությունը հեշտացրել է կեղծ հաշիվների ստեղծումը։ Այդ պատճառով World Money-ի որոշ ֆինանսական ծառայություններում ներդրվել է World ID-ի նույնականացումը։
World-ը Tools for Humanity ընկերության նախագիծն է, որի համահիմնադիրներն են Ալեքս Բլանիան և OpenAI-ի գլխավոր գործադիր տնօրեն Սեմ Ալթմանը։ Ընկերությունը «սուպերհավելվածի» ուղղությամբ սկսել է ընդլայնվել 2025թ.-ի մարտից՝ հավելվածում ավելացնելով կրիպտոարժույթներով վճարումների և չատի հնարավորություն։ Ավելի ուշ Circle-ը World-ում գործարկել է native USDC՝ World App-ի դրամապանակներում նախկինում օգտագործվող միջնորդավորված USDC-ի փոխարեն։
