Yandex Armenia-ն կազմակերպել է առաջին Coding and Math Contest-ը՝ ծրագրավորման և մաթեմատիկայի մրցույթ բուհերի ուսանողների և երիտասարդ ՏՏ մասնագետների համար։ Մրցույթին մասնակցելու համար ներկայացվել է ավելի քան 450 հայտ, իսկ երկու փուլերի արդյունքում հայտարարվել են 5 հաղթողներ Երևանի պետական համալսարանից և Հայաստանում ամերիկյան համալսարանից։
Երկու փուլերի ընթացքում մասնակիցները լուծում էին ալգորիթմների, հավանականության տեսության, մաթեմատիկական վերլուծության և գծային հանրահաշվի խնդիրներ՝ անգլերեն։
Հաղթողները կկարողանան Yandex Armenia-ում պրակտիկա անցնելու հարցազրույցի մասնակցել: Նրանց նաև պարզեցված ընդունելության հնարավորություն է տրվում Տվյալների վերլուծության դպրոց (Yandex School of Data Analysis)՝ երկամյա անվճար ծրագիր մեքենայական ուսուցման, մաթեմատիկական մոդելավորման և տվյալների վերլուծության ոլորտներում։
ՏՏ կրթության և համայնքի զարգացումը Yandex Armenia-ի առանցքային նպատակներից մեկն է։ Ընկերության մասնագետները կիսվում են իրենց փորձով ուսանողների և մասնագետների հետ համալսարաններում և Yandex Hall հարթակում, իսկ Վանաձորում և Գյումրիում՝ գործընկերների հետ համատեղ, ընկերությունը ձևավորել է անվճար Ծրագրավորման դպրոց դեռահասների համար։
