Խաբեբաները սկսել են օգտագործել ChatGPT-ն՝ ավելի խելացի և վստահելի ֆիշինգ (կիբեռհանցագործության տեսակ, որի նպատակն է ստանալ որևէ սոցիալական կայքի օգտատիրոջ գաղտնի տվյալները) նամակներ գրելու համար: Այս մասին հայտնել է Ռուսաստանում և ԱՊՀ երկրներում «Կասպերսկի լաբորատորիայի» գործադիր տնօրեն Աննա Կուլաշովան։
«Արհեստական բանականությունը գործիք է և ինչպես ցանկացած գործիք, այն պարունակում է և՛ հնարավորություններ, և՛ սպառնալիքներ, և իհարկե, այն կօգտագործվի իր բոլոր դրսևորումներով: Այդ թվում մենք արդեն տեսել ենք ChatGPT-ի օգտագործմամբ հարձակումներ»,- Սանկտ Պետերբուրգի միջազգային տնտեսական ֆորումի ժամանակ ասել է Աննա Կուլաշովան:
նրա խոսքով, Նախկինում ֆիշինգային էլ.փոստը հնարավոր էր տարբերել խոսքի սովորական գրագիտությամբ:
«Երբ հասկանում եք, որ նամակը տարօրինակ կերպով է կազմված, առկա են սխալներ և այլն, ապա դա ֆիշինգ է: ChatGPT-ի կիրառմամբ, այդ նամակներում սխալները շատ ավելի քիչ են դարձել: Բայց այն դեռ շատ խելացի չէ, իհարկե, նա սովորում և կատարելագործվում է, բայց մինչ այժմ ունակ չէ շատ բարդ բաների»,-ավելացրել է Կուլաշովան:
Ըստ նրա, արհեստական բանականությունը կարող է օգտագործվել նպատակային ֆիշինգի համար, երբ հարձակվում են կազմակերպությունների վրա: Այդպիսի հարձակումներին հնարավոր է նաև հակազդել:
«Մենք չպետք է մոռանանք, որ բարդ հարձակումը թանկ արժե և հետևաբար թանկ է նաև նեյրոնային ցանցի օգտագործումը»,-եզրափակել է Կուլաշովան:
Նշենք, որ Սանկտ Պետերբուրգի միջազգային տնտեսական համաժողովն անցկացվում է հունիսի 14-17-ը։
