Համաձայն Stack Overflow-ի նոր ուսումնասիրության, ծրագրավորողների գրեթե երեք քառորդը՝ 74%-ը, ակտիվորեն փնտրում է նոր աշխատանք կամ բաց է առաջարկների համար:
Ավելին, ամենաերիտասարդ ծրագրավորողներն ամենաակտիվորեն նոր հնարավորություններ են փնտրում։ Այդպիսիների տեսակարար կշիռն ամենամեծն է եղել 20-24 տարեկանների շրջանում (27%), 25-34 տարեկան հարցվածների շրջանում աշխատանքը փոխել ցանկացողները 21% են, իսկ 35-44 տարեկան հարցվածների շրջանում 17%-ն է ուզում փոխել աշխատանքը: 45-54 տարեկան հարցվածների շրջանում՝ ընդամենը 12% է ցանկություն հայտնել: Երիտասարդ ծրագրավորողների մասնաբաժինը, որոնք ակտիվորեն փնտրում են նոր աշխատանք, տարվա ընթացքում աճել է 9 տոկոսային կետով։
Stack Overflow-ը հիշեցրեց, որ նոր ընկերության որոնմանը պետք է մոտենալ ամենայն պատասխանատվությամբ և ընտրել նրանց, որոնք ֆինանսապես կայուն են, հատկապես աշխարհում առկա տնտեսական խնդիրների ֆոնին։ Ծրագրավորողներին նաև խորհուրդ է տրվել չդադարեցնել սովորելը, քանի որ տեխնոլոգիաները շատ արագ են զարգանում, և նրանք, ովքեր անընդհատ կատարելագործում են իրենց հմտությունները, շուկայում պահանջարկ կունենան։ ԱՄՆ Աշխատանքի նախարարության կանխատեսումների համաձայն՝ ծրագրային ապահովման մշակողների թափուր աշխատատեղերի թիվը 2031 թվականին կաճի 26%-ով՝ բոլոր մասնագիտությունների միջինը 5%-ի դիմաց։
Stack Overflow-ի կողմից հարցվածների համար նոր մարտահրավեր փնտրելու հիմնական դրդապատճառը ավելի շատ ճկունություն ունենալու ցանկությունն էր. հարցվածների 58%-ը պատասխանել է այսպես. հարցվածների 46%-ը որպես ընթացիկ աշխատանքի հիմնական թերություն նշել է աշխատանքային օրվա ֆիքսված մեկնարկի և ավարտի ժամերը, 44%-ի համար գրասենյակ գնալու անհրաժեշտությունը նույնպես դարձել է թերություն։
