Թվային վճարումների գծով աշխարհի առաջատար Visa-ն և Հայաստանի առաջատար թվային ֆինանսական հարթակ և ֆինտեխ ընկերություն Իդրամը, նոյեմբերի 16-ին ստորագրեցին փոխըմբռնման հուշագիր Կենտրոնական Եվրոպայի, Միջին Արևելքի և Աֆրիկայի շուկաներում համագործակցության վերաբերյալ՝ առաջադեմ ֆինտեխ լուծումներ տրամադրելու համար:
Հուշագիրը ենթադրում է ռազմավարական համագործակցություն և այնպիսի տեխնոլոգիական լուծումների համատեղ առաջխաղացում, ինչպիսիք են անհպում վճարումները, BNPL (Գնիր հիմա, վճարիր հետո), թվային հավատարմության համակարգերը նշված շուկաներում: Ըստ Idram-ի տնօրեն Արսեն Քդենյանի՝ համագործակցությունը նոր դարաշրջան կբացի ընկերության համար։
«Մենք ուրախ ենք համագործակցել VISA-ի նման համաշխարհային և առաջադեմ տեխնոլոգիական ընկերության հետ: Մենք ոգեշնչված ենք Կենտրոնական Եվրոպայի, Միջին Արևելքի և Աֆրիկայի շուկաներում համատեղ զարգացման հնարավորություններով, ներառյալ այն պրոդուկտներն ու լուծումները, որոնք մենք հաջողությամբ մշակել ենք հայաստանյան շուկայում, ինչպիսիք են անհպում վճարումները, BNPL-ը, թվային լոյալության համակարգը և այլն: Հուսով եմ, որ Idram-ի և IDBank-ի հետ համագործակցության օրինակով Visa-ի գործընկերները կարողացան գնահատել մեր ներուժն ու լուծումները, որոնց արդյունքում ստացվեց մեր այսօրվա հուշագիրը։ Շնորհավորում եմ բոլորիս, ողջունում VISA-ի մեր գործընկերներին և մաղթում հաջող ու երկարաժամկետ համագործակցություն»,- ասաց Արսեն Քդենյանը։
«Մենք չափազանց հպարտ ենք Հայաստանում Visa-ի ներկայության 20-ամյակը նշելու և մեր գործընկերությունը շարունակելու համար: Ուրախ ենք սկսել համագործակցությունը ֆինտեխ առաջատար հարթակներից մեկի՝ Idram-ի հետ և փոխըմբռնման հուշագիր ստորագրել: Visa-ն հավատարիմ է նորարարություններին և թվային վճարումների զարգացմանը, և մենք հավատում ենք, որ սա ևս մեկ քայլ է առաջ՝ դեպի անկանխիկ տնտեսություն: Համագործակցության շրջանակներում մենք կկարողանանք առաջարկել այս լուծումները Կենտրոնական Եվրոպայի, Միջին Արևելքի և Աֆրիկայի շուկաներում, որտեղ Visa-ն հաջողությամբ ծավալում է իր գործունեությունը», – ավելացրեց Visa-ի Կովկասի տարածաշրջանային մենեջեր Դիանա Կիգուրաձեն:
Idram-ը Հայաստանում առաջատար ֆինտեխ ընկերություն է, որը տրամադրում է և՛ թվային դրամապանակ, և՛ բանկինգ IDBank-ի հետ գործակցելով՝ Idram&, IDBank թվային ֆինանսական հարթակի միջոցով: Հավելվածի առանձնահատկություններից են. 400+ առցանց ծառայությունների համար վճարումները, թվային և պլաստիկ քարտերի առցանց պատվիրումը, QR և NFC վճարումները վաճառակետերում, առցանց վեբ և բջջային վճարումները, Գնի՛ր հիմա, վճարի՛ր ավելի ուշ թվային ապառիկը, թվային բանկինգը, ամբողջական հեռավար նույնականացում և շատ ավելին։
Visa-ն թվային վճարումների համաշխարհային առաջատարն է, որն ամեն տարի հեշտացնում է գործարքները սպառողների, բիզնեսների, ֆինանսական հաստատությունների և պետական կառույցների միջև ավելի քան 200 երկրներում և տարածաշրջաններում: Ընկերության առաքելությունն է միացնել աշխարհը ամենանորարար, հարմար, հուսալի և անվտանգ վճարային ցանցի միջոցով՝ հնարավորություն տալով անհատներին, բիզնեսներին և տնտեսություններին բարգավաճել:
Ֆինտեխ և բիզնես ոլորտի նորությունների ծանոթացեք՝ միանալով մեր Տելեգրամյան ալիքին
