Չափազանց կարևոր է հասկանալ, թե ինչպես է աշխարհը թվայնացվում և փոխակերպվում, և շատ կարևոր է փոխակերպման և թվայնացման այս ընկալումը բերել Հայաստան: Այսօր Երևանում ընթացող Doing Digital ֆորումի շրջանակում լրագրողների հետ զրույցում ասաց թվային փոխակերպումների և ֆինթեքի միջազգային փորձագետ Քրիս Սքիները:
Նշենք, որ Երևանում տեղի է ունեցել Doing Digital ֆորումը, որի գլխավոր խոսնակը Քրիս Սքիներն էր: Նա տեխնոլոգիաների և ֆինանսական շուկաների ամենաազդեցիկ մասնագետներից ու ամենավաճառվող հեղինակներից մեկն է աշխարհում:
Ըստ նրա, դրա համար հինական երկու պատճառ կա, ըստ որի եթե այս տարածաշրջանի երկրները չներգրավվեն թվայնացման և փոխակերպման մեջ, նրանք կկորցնեն տնտեսության մրցակցային առավելությունները և տարածաշրջանի մյուս երկրներից հետ կմնան:
«Երկրորդը, տարածաշրջանի երկրների շարքում Հայաստանը կարող է իրեն դիրքավորել որպես թվայնացման տարածաշրջանային կենտրոն և ֆինանսական տեխնոլոգիաների՝ ֆինթեքի հիմնական հաբ»,-ասաց Սքիները:
Սքիները կարևոր է համարում, որ բանկերը, երկրի ղեկավարությունը ստանձնեն թվային փոխակերպումն իրականացնելու առաջնորդությունը։
«Եթե ֆինանսական հաստատության ղեկավարությունը չի ընկալում դա, ապա դա տեղի չի ունենալու: Ոչ միայն բանկի ղեկավարությունը, այլ նաև երկրի ղեկավարությունը պետք է առաջնորդություն ստանձնեն թվային փոխակերպման առումով՝ վարչապետը, փոխվարչապետը, ԿԲ նախագահը: Որպեսզի Հայաստանը դառնա թվային փոխակերպման տարածաշրջանային կենտրոն, անհրաժեշտ է, որ պետության ղեկավարությունը նույնպես հասկանա դա և ստանձնի առաջնորդությունը: Այն փաստը, որ այս ֆորումին ներկայացված են փոխվարչապետը, ԿԲ նախագահը, ցույց է տալիս, որ երկրի ղեկավարության մոտ կա այդ ընկալումը և հանձնառությունն ստանձնված է, որպեսզի այդ թվային փոխակերպումը տեղի ունենա»,- ասաց նա:
