Վերակառուցման և զարգացման միջազգային բանկի (ՎԶԵԲ) ու Հայաստանի միջև կստորագրվի «Կանաչ, դիմակայուն և ներառական զարգացման քաղաքականության վարկ» բյուջետային աջակցության վարկային համաձայնագիրը՝ €92,300,000 արժողությամբ:
Կառավարությունն այսօրվա նիստում հավանության արժանացրեց վարկային համաձայնագրի նախագիծը:
Նշվում է, որ պետական բյուջեի կատեգորիաներով նախատեսված ծախսերի ֆինանսավորման տեսանկյունից վարկային միջոցների ժամանակին ստացումը կարևոր նշանակություն ունի:
Բյուջետային աջակցության միջոցների ստացման համար նախապայման է մի շարք ոլորտներում միջոցառումների և բարեփոխումների իրականացումը:
Ծրագրի շրջանակը ներառում է կլիմայի փոփոխության մեղմացման և հարմարվողականության խթանում ու շրջակա միջավայրի կառավարման համար կարգավորող շրջանակի բարելավում, Հավասարության ամրապնդում և մարդկային կապիտալի զարգացման խթանում, Հակակոռուպցիոն շրջանակի և արդարադատության ոլորտի արդյունավետության հզորացում։
Նշվում է, որ վարկային համաձայնագիրը Հայաստանի պետական բյուջեի համար առաջացնում է լրացուցիչ ֆինանսական պարտավորություններ, սակայն մանրամասներ ներկայացված չեն:
