WhatsApp-ը հայտարարել է մեսենջերում ալիքների գործարկման մասին:
Այն թույլ կտա հենց հավելվածի ներսում ստանալ մարդկանց և կազմակերպությունների մասին նորություններ, այնպես ինչպես Telegram-ում է:
Ադմինիստրատորները կկարողանան հրապարակել իրենց բովանդակությունը՝ տեքստ, լուսանկարներ, նկարներ, սթիքերներ և տեսանյութեր, ինչպես նաև հարցումներ անցկացնել:
«Մենք ստեղծում ենք ալիքների կատալոգ՝ տեղական պետական մարմինների նորություններով, սպորտի, հոբբիների և այլնի մասին բովանդակությամբ»,- ասվում է ընկերության տարածած հաղորդագրության մեջ:
Օգտատերը կարող է մուտք գործել ցանկալի ալիք հրավերով կամ որոնման միջոցով: Բաժանորդների տվյալները (հեռախոսահամարներ, պրոֆիլի լուսանկարներ) կթաքցվեն ինչպես այլ օգտվողներից, այնպես էլ ալիքների ադմինիստրատորներից:
Բացի դրանից, ոչ ոք չի տեսնի, թե որ ալիքներին է բաժանորդագրված կոնկրետ օգտատերը։ Ալիքում հրապարակման պատմությունը կպահպանվի 30 օր, որից հետո՝ կջնջվի։ Մշակողները նախատեսում են հետագայում ավելացնել բաժանորդների սարքերից պատմությունը ջնջելու հնարավորությունը նախքան 30-օրյա ժամկետի լրանալը։
